Малчин айл гэж хүнс хоол, хувцас хунар, эд хэрэглэлээ өөрсдөө хийж чаддаг, хот айл, саахалт айл, нутаг усныхантайгаа хоршиж хамтраад хийх, солилцоод авдаг чадвар, харилцаатай айл юм.
Малчин айлд өглөө үхрийн баас хураах, орой үхэр хөөж ирж хотлуулахаас эхлээд бүхий л ажилд хүүхэд, хүн бүхний тус нэмэр хэрэгтэй.
Та өөрөө болон хамт явж байгаа хүүхэд, залуус, хэн бүхнийг тал хээрийн салхи, элс шороо, бороо цастай эсэх гээд цаг агаарын урьдчилсан мэдээг харж, малгай, дээл, хагас түрийтэй гутал, дулаан хувцаслахыг зөвлөөрэй.
Хүн бүр хувийн аяга, халбага, аяганы алчуураа аваарай. Малчин айл илүү аяга, халбага хадгалах, авч нүүдэггүй гэж ойлгоорой.
Хөнжил, дэвсгэр даавуу, гар нүүрийн алчуураа авч ирээрэй.
Танайд очих гэж байна, юу авч очих вэ, захих зүйл байна уу гэж асууж холбогдоорой. Тэгээд захисан зүйлээс нь өөр зүйл нэмж авч очих хэрэггүй.
Холбогдож асуух боломжгүй бол юуг ч өөрийн дураар, дуртай, хэрэгтэй байх гэсэн хүнс, барааг бэлэг болгон авч очихыг тэвчээрэй.
Харин очсон хойноо данс руу нь мөнгө шилжүүлж, эсвэл бэлэн мөнгө өгч тэр айлаа өөрсдөө худаддаж авах боломжийг олгоорой.
Comments